ЧИНГИС СООСЭ ОЛОН УЛСЫН ХАРИЛЦАА

Оюуны хүч-амжилтын үндэс

Захирлын мэндчилгээ

Эрхэм хүндэт эрэдэмтэн багш нар, оюутан залуус эцэг эхчүүд та бүхэнтэй цахим хуудсаараа мэндчилж байгаадаа туйлын баяртай байна.

Чингис соосэ олон улсын харилцааны сургууль нь нийгмийн хэрэгцээ шаардлагад нийцүүлэн олон улсын эрх зүйч, олон улсын харилцааны ажилтан, аюулгүй байдал, хууль сахиулахын чиглэлээр 5000 гаруй мэргэжилтэн хөдөлмөрийн зах зээлд бэлтгэн нийлүүлсэн бөгөөд тэд сургуулийхаа нэр хүндийг өндөрт өргөн, салбар салбартаа үр бүтээлтэй ажиллаж байна.

Манай сургуулийн хамт олон оюутан суралцагчдын бүтээлч хандлагыг хөгжүүлэх, сургалтын материаллаг баазыг бэхжүүлэх, сургалтын чанар, үр өгөөжийг дээшлүүлэх, оюутан бүрт хүртээмжтэй үйлчилгээ үзүүлэх , багшлах боловсон хүчний эрдэм судалгааны ажлыг хөхүүлэн дэмжих , зөв хандлага, сэтгэлгээтэй төгсөгчдийг нийгэмд бэлтгэн гаргах зорилттой ажиллаж байна.

Бидний амжилт бүтээл жилээс жилд улам бүр нэмэгдэн,сургуулийнхаа болон эх орныхоо хөгжил дэвшилд үнэтэй хувь нэмэр оруулна гэдэгт эргэлзэхгүй байна.

Эрдэм номын цагаан буян мөнхөд дэлгэрэх болтугай.

Хүндэтгэсэн: Захирал Л. Оюун

Түүхэн товчоо

Чингис Соосэ Олон улсын харилцааны сургууль нь 2000 оноос сургалт хүмүүжлийн ажлаа явуулж эхэлсэн, Их засаг Олон улсын их сургуулийн томоохон салбар сургуулиудын нэг юм.

Чингис Соосэ олон улсын харилцааны сургуульд:

Олон улсын ба гадаад харилцааны ажилтан

Олон улсын эрх зүй

Эрх зүй

Аюулгүй байдал, хууль сахиулахын чиглэлээр 1300 гаруй оюутан суралцаж байна.

Дээр дурдсан мэргэжлээр 5000 гаруй төгсөгчдийг хөдөлмөрийн зах зээлд нийлүүлж, төгсөгчдийн 70 гаруй хувь нь төрийн болон хувийн хэвшлийн аж ахуйн нэгж, хууль хяналтын байгууллагуудад нэр хүндтэй ажиллаж байна.

Чингис Соосэ олон улсын харилцааны сургууль нь бусад салбар сургуулиудтай мөр зэрэгцэн ИЗОУИС-ийн зорилго, зорилт, бодлого шийдвэрийг хэрэгжүүлэхэд үнэтэй хувь нэмрээ оруулан, сургуулийн материаллаг баазыг бэхжүүлэх, оюутан суралцагчдын суралцах таатай орчныг бүрдүүлэх, багш, оюутнуудын идэвх санаачилгыг хөхүүлэн дэмжин “Оюуны хүч-амжилтын үндэс” уриатайгаар сургалт, эрдэм шинжилгээ, соёл олон нийтийн ажлыг амжилттай зохион байгуулан ажиллаж байна.

Тус сургууль нь “Оюутны намар” урлагийн их наадмын 7 удаагийн шилдгийн шилдэг сургууль, “Бага олимп” спортын наадмын 2 удаагийн шилдэг, ИЗОУИС-ийн Сагсан бөмбөгийн 12 удаагийн аварга, Хөл бөмбөгийн улсын аварга шалгаруулах тэмцээний тэргүүн байрын шагналт , Таеквондогийн оюутны улсын аварга шалгаруулах тэмцээний тэргүүн байрын шагналт, ИЗОУИС-ийн Шилдэг тохижилттой сургуульюм.

ЧСОУХС-д суралцаж буй оюутнууд өөрийн авъяас чадвар, шинэ санаа санаачилгаа хөгжүүлэх бүрэн боломжоор хангагдсан бөгөөд үүний тод жишээ нь жил бүр ИЗОУИС-ийн захиргаанаас зохион байгуулагддаг Супер студент тэтгэлэгт хөтөлбөр юм. Уг хөтөлбөрийн хүрээнд тус сургуулийн 10 гаруй оюутан Япон, БНСУ, АНУ-д нэг жил үнэ төлбөргүй суралцах эрхээр шагнагдансуралцаад ирсэн юм.

Оюутан суралцагчдын эрдэм судалгааны ажлыг дэмжих, тэднийг судалгаа шинжилгээ хийх арга барилтай болгох, хөгжүүлэх зорилгоор зохион байгуулагддаг “Их засаг-орчин үе”, Ж. Цэвээний нэрэмжит “Нэрт соён гэгэрүүлэгчид” намтар судлалын, “Олон улсын харилцаа ба глобалчлал” зэрэг оюутны эрдэм шинжилгээний хурлуудад тус сургуулийн оюутнууд хүчтэй өрсөлдөгч байж, тэргүүн болон шагналт байруудад шалгардаг.

ДАВУУ ТАЛ, онцлог

Үндэсний түүх соёлоо дээдэлдэг, ёс суртахууны зөв төлөвшилтэй, гадаад хэл, компьютерийн мэдлэг чадварыг эзэмшсэн, онол, практикийг хослуулан багаар ажиллах чадвартай эрх зүй, олон улсын эрх зүй, олон улсын харилцааны ажилтан, аюулгүй байдал, хууль сахиулахын чиглэлээр мэргэжилтэн бэлтгэн гаргадаг

  • Мэргэжлийн хичээлээс гадна япон, хятад, солонгос хэлийг сонгон судалдаг.
  • Оюутан залуусыг бүх талаар хөгжих боломжоор хангаж, мэргэжлийн АСТ, олимпиад, мэтгэлцээн, эрдэм шинжилгээний хурал, хэлэлцүүлэгт оролцоход санхүүгийн тусламж дэмжлэг үзүүлдэг.
  • Оюутан суралцагчдын санал санаачилгыг дэмжин, өөрсдийнх нь байгуулсан сайн дурын байгууллага, клубуудын үйл ажиллагааг хөхүүлэн дэмжин ажилладаг. Тэдний явуулж буй үйл ажиллагаагаар дамжуулан оюутнуудын бие даан суралцах чадварыг хөгжүүлэх, чөлөөт цагийг зөв боловсон өнгөрүүлэх бүрэн боломжийг нээж өгдөг.
  • Оюутан солилцооны хөтөлбөр хэрэгжүүлж, Япон улсад цалинтай дадлага хийлгэдэг.
  • Супер студент тэтгэлэгт хөтөлбөрт хамрагдаж, гадаадын нэр хүндтэй их дээд сургуулиудад 100% тэтгэлэгтэйгээр суралцах боломжтой.
  • Төгсөгчдийн 70-ас дээш хувь нь ажлын байртай. Салбар салбартаа нэр хүндтэй ажиллаж байна.