Ректорын мэндчилгээ

Чингис хааны нэрэмжит Их Засаг Олон Улсын Их Сургууль Чин зоригт дээдсийн амьсгал шингэсэн өргөө Мөнх тэнгэрийн хүчин дор оршсон Их Засаг Олон Улсын Их Сургууль Мөрөөдөл хүслээ биелүүлэх эрдмийн их өргөө ... гэсэн билэгтэй сайхан үгээр та бүхнийхээ хаан амрыг амарчилж, хатан мэндийг мэдье.

Дэлхийг төвшитгөсөн Их Засаг хууль батлагдсаны 818 жилийн ой, Чингис хааны нэрэмжит Их Засаг Олон Улсын Их Сургууль үүсэн байгуулагдсаны 30 жилийн ойн баярын мэндчилгээ дэвшүүлье. Их Засаг Олон Улсын Их Сургууль 1994 онд Монгол удирдлага, технологийн дээд сургууль нэртэйгээр үүсэн байгуулагдаж, 1996 онд Их Засаг Хууль зүйн дээд сургууль, 2000 онд Их Засаг их сургууль, 2011 онд Их Засаг Олон Улсын Их Сургууль болж өргөжсөн түүхтэй. Их Засаг Олон Улсын Их Сургууль Боловсролын магадлан итгэмжлэх үндэсний зөвлөлөөр 5 дахь удаагаа 10 жилийн хугацаатай, Их Британий магадлан итгэмжлэх үндэсний зөвлөлөөр 2 дахь удаагаа тус тус магадлан итгэмжлэгдэж дэлхийн 20 гаруй орны 280 гаруй их сургууль манай сургуулийн хөтөлбөр диплом, сурлагын дүнг хүлээн зөвшөөрч тэдгээр сургуулиудад манай оюутнуудыг шилжүүлэн суралцуулах боломж бүрдсэнээр Их Засаг олон улсын их сургууль Дэлхийн сургууль болсон амжилтаар түүхт 30 жилийн ойгоо угтаж байна. Их Засагчуудын зогсолтгүй хөгжлийн хөдөлгүүр болсон “Цогц боловсрол, өв тэгш хүмүүжил” олгох хөтөлбөрийг хэрэгжүүлж оюутан суралцагчдадаа бүх талын өв тэгш хүмүүжил олгохын төлөө манай хамт олон хичээнгүйлэн ажилласаар байна. 13-р зууны Монголыг төвхнүүлсэн Их Засаг хуулиар овоглож 21-р зууны өнгөнд үүсч хөгжиж өөдлөн мандсан Их Засаг Олон Улсын Их Сургуулийн эрдэмтэн багш ажилтан, ажилчид, төгсөгчид болон оюутнууддаа Их Засаг хууль батлагдсаны 818 жилийн ой, Чингис хааны нэрэмжит Их Засаг олон улсын их сургууль байгуулагдсаны 30 жилийн ойг тохиолдуулан чин сэтгэлийн халуун баяр хүргэе. Эрдмийн хамт олонтойгоо цуг өсч хөгжсөн Их Засагчууд минь элгээрээ энх амгалан төрлөөрөө түвшин амгалан байхын ерөөлийг дэвшүүлье.

Чингис хааны нэрэмжит Их засаг Олон улсын их сургуулийн ректор, Монгол Улсын Ардын багш, доктор, (Sc.D), профессор 
Намсрайн Ням-Осор