Их Засаг ОУИС Бейсбол, Софтбол, Тийболын спортыг хөгжүүлэхээр хамтран ажиллана
Их Засаг Олон Улсын Их Сургууль Монголын Бейсбол, Софтболын Үндэсний Холбоо, Тийболын Үндэсний Холбоотой хамтран ажиллаж, бейсбол, софтбол, тийболын спортыг оюутнуудад танилцуулах, уралдаан тэмцээнд тогтмол хамруулах зэрэг үйл ажиллагааг зохион байгуулахаар боллоо.
Хамтын ажиллагааны хүрээнд Их Засаг ОУИС-ийн оюутнууд эдгээр спортоор хичээллэх боломжтой болохын зэрэгцээ мэргэжлийн сургалт, дадлага, тэмцээн уралдаанд оролцох өргөн боломж нээгдэх юм. Энэхүү түншлэлийн гол зорилго нь оюутнуудын бие бялдрын хөгжил, багаар ажиллах чадвар, спортын соёлыг түгээн дэлгэрүүлэхэд чиглэж байна.
Хамтран ажиллах санамж бичигт Их Засаг ОУИС-ийн Хүний хөгжил, хамтын ажиллагаа эрхэлсэн проректор Б.Мэндбаяр, Монголын Бейсбол, Софтболын Үндэсний Холбооны Дэд Ерөнхийлөгч Ч.Мөнхсайхан нар гарын үсэг зурлаа.
Энэхүү хамтын ажиллагаа нь оюутнуудын спортын хөгжилд шинэ боломжийг нээж, бейсбол, софтбол, тийболын спортыг Монгол Улсад түгээн дэлгэрүүлэхэд чухал хувь нэмэр оруулна гэж үзэж байна.
